«Ақтау теңіз порты» АЭА-да бекіре зауыты салынады

Маңғыстау облысында жеке инвестициялар есебінен балық шаруашылығы бойынша 30 млрд теңге сомасына үш жобаны іске асыру жоспарлануда. Соның бірі - «Beluga Queen» ЖШС жүзеге асыратын «Ақтау теңіз порты» АЭА аумағында бекіре зауытының құрылысы. Бұл туралы бүгін Үкімет отырысында ҚР экология, геология және табиғи ресурстар министрі Серікқали Брекешев хабарлады.

ҰЭМ басшысының айтуынша, үш жобаны жүзеге асыру нәтижесінде өңірде балық өндірісі 30 тоннадан 10,6 мың тоннаға дейін артады. Бұл ретте 3 мыңнан астам жұмыс орны құрылатын болады.

«Министрлік инвестициялық субсидиялар бөледі. Облыс әкімдігі инфрақұрылымды құру және жемшөпке, балық өсіру материалы мен дәрілік препараттарға субсидия бөлу бойынша шаралар қабылдайтын болады», - деп атап өтті Серікқали Брекешев.

Тақырып бойынша оқу: Маңғыстауда құдық қазуға қосымша субсидия бөлінеді

Маңғыстау облысының әлеуметтік-экономикалық дамуының 2021-2025 жылдарға арналған кешенді жоспарына сәйкес өңірде АӨК саласында жалпы сомасы 147,3 млрд.теңгеге 25 инвестициялық жобаны іске асыру, сондай-ақ жемшөп қорының тұрақтандыру қорын қалыптастыру жоспарлануда. Инвестициялық жобалар жылыжайлар салуды, балық өсіруді, құрама жем, құс етін өндіруді көздейді. Оның ішінде құны 8,8 млрд теңгені құрайтын 12 инвестициялық жоба биыл іске қосылатын болады.

«Инвестициялық жобаларды іске асыру құс еті өндірісін жылына 5 мың тоннаға дейін, көкөніс өнімдерін – жылына 23,4 мың тоннаға дейін, құрама жем - жылына 15 мың тоннаға дейін, сүт өнімдерін - жылына 5 мың тоннаға дейін арттырады, жұмыртқа мен ұн өндірісін тиісінше 1,4 млн данаға және 960 мың тоннаға дейін арттырады. Сондай-ақ, 4 335 жұмыс орнын ашуға мүмкіндік береді», - деді Ауыл шаруашылығы министрі Ербол Қарашөкеев.

Оның айтуынша, кешенді жоспарда жоспарланған іс-шараларды іске асыру нәтижесінде Маңғыстау облысының Ауыл шаруашылығы жалпы өнімінің көлемі 2025 жылға қарай 38,8%-ға ұлғайып, 34 млрд теңгені құрайтын болады.