Тоқаев: азық-түлік бағасы барлық абсолютті рекордтарды жаңартуы мүмкін

ҚР Президенті Қасым-Жомарт Тоқаев мемлекеттік органдарға егін егуге дайындық кезінде фермерлерге жедел қолдау көрсетуді тапсырды. Сондай-ақ геосаяси ахуалдың шиеленісуі және ұлттық валюта бағамының төмендеуі аясында таяу уақытта қарқынды өсуі мүмкін тамақ өнімдеріне бағаларды тежеу шараларын пысықтау қажет.

"Украинадағы оқиғалар азық-түлік бағасының күрт өсуіне әкелді. Олар көп ұзамай барлық абсолютті рекордтарды жаңартуы әбден мүмкін. Осыған байланысты егіс науқанын сапалы жүргізу бірінші орынға шығады. Алайда, менің білуімше, көптеген фермерлер егістікке әлі дайын емес. Үкімет пен әкімдіктерге бұл жұмысты ерекше бақылауға алу талап етіледі", - деді Қасым-Жомарт Тоқаев бүгін Қазақстан халқына арнаған Жолдауында.

Мемлекет басшысы шаруаларды ЖЖМ қажетті көлемімен қолайлы бағамен қамтамасыз ету маңызды екенін атап өтті. Сондай-ақ, оның айтуынша, ауыл шаруашылығы техникасының дайындығын, тұқым мен тыңайтқыш қорларын қайта тексеру керек.

Сонымен қатар, ол мемлекеттік органдарды фермерлермен бірлесіп саланы одан әрі қолдау бағыттарын пысықтауға шақырды.

"Бірқатар өңірлерде жауын-шашынның төмен деңгейі түсімділікке теріс әсер етіп, жемшөптің жетіспеуіне әкелуі мүмкін екенін ұмытпауымыз керек. Жалпы, фермерлер қауымдастығымен бірлесіп, агроөнеркәсіптік кешенді мемлекеттік қолдау тәсілдерін қайта қарау қажет. Азық-түліктің тапшылығы мен бақылаусыз қымбаттауының алдын алу үшін мемлекеттік тұрақтандыру қорларына форвардтық бағалар бойынша ауыл шаруашылығы өнімдерін сатып алу мәселесін пысықтау қажет", - деді президент.

Жалпы, ол мемлекеттік аппарат жұмысын қайта құру және бюрократиядан кету қажеттілігін атап өтті. Мемлекеттік ведомстволар жағдайға жедел ден қойып, барынша үйлесімді іс-қимыл жасауы тиіс.

"Шешім қабылдаудың жайсыздығы, бюрократиялық формализм бұл жерде қолайсыз. Қазір толықтай жұмылдыру қажет. Шешімдер бизнес пен азаматтардың нақты сұраныстарына сүйене отырып, ең көбі үш күн, ал одан жақсырақ бір күн ішінде тез қабылдануы керек. Үкімет жанынан құрылған Жедел штаб нақты уақыт режимінде ақпаратқа талдау жүргізетін, сондай-ақ нақты шұғыл шаралар әзірлейтін ахуалдық орталық ретінде бір мезгілде жұмыс істеуі тиіс", - деді мемлекет басшысы.