Қазақстандағы жаппай егін егу жұмыстары 15 мамырда басталады

Қазақстанның Ауыл шаруашылық министрлігі жаппай егіс науқаны 15 мамырда  басталатындығын жариялады.

«Қазіргі таңда Қазақстанның оңтүстік аймақтарында диқандар алқаптың 70 пайызына тұқым септі. Астық егетін үш облыста - Ақмола, Қостанай және Солтүстік Қазақстан облыстарында ылғалдандыру жұмыстары аяқталды, егістікке дейінгі дайындық  жұмыстары жүргізілуде. Мамырдың ортасында бүкіл республика бойынша көктемгі дәнді дақылдарды жаппай себу жұмыстары күтілуде», — деді Қостанай облысына жұмыс сапарымен барған ҚР Ауыл шаруашылығы министрінің бірінші орынбасары Айдарбек Сапаров.

Ауыл шаруашылығы министрлігінің баспасөз қызметі хабарлағандай, Сапаров Сарыкөл ауданындағы бірнеше шаруа қожалықтарының, орта және ірі ауылшаруашылық  алқаптарындағы жұмыстармен танысты. Облыстағы диқандар 4,7 миллион гектар алқапқа тұқым себуге дайындалып жатыр. Аудандардың көп бөлігіне — 81% немесе 3,8 млн гектарға дәнді және бұршақ дақылдары отырғызылатын болады.

 Биыл дақылдарды әртараптандыру жұмысы аясында қостанайлық фермерлер майлы дақылдар егілетін алқапты 700 мың гектарға дейін ұлғайтады: бұл 2019 жылмен салыстырғанда  200 мың гектарға көп. Сонымен қатар малға арналған жемшөп дақылдарының алқабы 176 мың гектарға дейін қысқарады (бұрын — 237 мың болған).

Облыс әкімдігінің хабарлауынша, диқандар егін егу үшін тұқыммен толық қамтамасыз етілген, 528 мың тонна тұқым себу үшін дайындалған.

Бірінші вице-министрмен  кездесулер барысында аграршылар бірқатар проблемалық мәселелерін көтерді.

«Шаруалар тұқымдар, тыңайтқыштарды қолдану туралы, тұқымның бағасы мен субсидиялау туралы сауалдарын қойды. Біз министрлікте департамент директорларымен бірқатар мәселелерді талқылайтын боламыз. Бұдан былай мұндай оқиғалар орын алмас үшін жан-жақты қарастыратын боламыз. Фермерлерді мал және ветеринария мәселелері де толғандыратынын айтты», — деп хабарлады Айдарбек Сапаров.