Түркістан облысында Өзбекстанмен бірге ауылшаруашылық техникаларын құрастыратын болады

Түркістан облысының әкімдігі, «Узагротехсаноатхолдинг» АҚ және Orbis Kazakhstan компаниялары инвестициялық келісімшартқа және ауылшаруашылық техникаларын құрастыру жобасын жасаудың Жол картасына қол қойды. Бұл туралы облыс әкімінің баспасөз қызметі хабарлады.

«Узагротехсаноатхолдинг» және Orbis Kazakhstan компаниялары Түркістанның индустриалды аймағындағы Brownfield өндіріс алаңында ауылшаруашылық техникаларын құрастыру бойынша бірлескен жобаны жүзеге асырмақшы. Аталған жобаны үш кезең бойынша орындау  жоспарлануда. Инвестициялардың жалпы көлемі шамамен 12 миллион долларды құрайды», - деп хабарлады әкімдік.

Кәсіпорын толықтай жұмыс істеген кезде шамамен 100 жұмыс орны ашылады.

Түркістан облысының әкімі Өмірзақ Шөкеев инвесторлармен кездесу барысында жобаның маңызды екендігін атап өтті.

«Елімізде орта есеппен 185 мың техниканың 76%, ал облыстарда 19 мың техниканың 83% -ының тозығы жеткен, аталған ауыл шаруашылық техникаларының ескіргенін ескере отырып, бұл жоба өте өзекті болып табылады. Бүгінгі таңда мемлекет инвестициялық субсидиялар, фермерлерге ауылшаруашылық техникасын сатып алуға субсидиялар (25% дейін), жеңілдетілген несиелер, лизингке ауылшаруашылық техникаларын сатып алу жолдарымен, сондай-ақ инфрақұрылым түрінде көптеген мемлекеттік қолдау шараларын ұсынады», - деді ол.

Баспасөз қызметінің хабарлауынша, инвесторлар ауылшаруашылық техникаларын локализациялау мүмкіндігі бар өндірісті ұйымдастыруды жоспарлап отыр. Индустриалды аймақта олар 110 ат күші бар әмбебап қопсытқыш тракторларды, қуаттылығы 80 ат күші бар мақтаға арналған  тракторларды, сондай-ақ мақта жинайтын машиналарды, 4 тоннаға дейін жүк көтере алатын трактор тіркемелерін, айналмалы шөп шапқыштарды, желдеткіш бүріккіштерді, мақта өсіретін қопсытқыштарды және соқаларды құрастыратын болады.

Сонымен бірге, «Узагротехсаноатхолдинг» қазақстандық мамандарды даярлау және олардың біліктілігін арттыру үшін жауапкершілікті өз мойнына алады, сондай-ақ техникалық персонал үшін практикалық сабақтар ұйымдастырады.

Компания басшылығы қазақстандық серіктес компаниямен бірге жұмыс істеп, 49/51% мөлшерлік үлеспен жобаны жүзеге асыруды ойластырып отыр.

Orbis Kazakhstan компаниясы Қазақстан аумағында ауыл шаруашылық техникаларын сатуға арналған дилерлік және сервистік желіні дамытуды жоспарлап отыр.

Әкімдік сондай-ақ, 2019 жылдың соңында Түркістан облысы мен Өзбекстан арасындағы тауар айналымы 377 миллион доллар, оның ішінде экспорт - 170 миллион доллар, импорт 207 миллион долларды құрағанын атап өтті.

 

Узнавайте первыми самые свежие новости агробизнеса Казахстана на нашей странице в Facebook, канале в Telegram, подписывайтесь на нас в Instagram или на нашу рассылку.