«Бижан» ет өңдеу зауыты Қазақстандағы сатылымды кеңейтіп, экспортқа өнім шығара бастайды

Алматы қаласының Индустриалды аймағында іске қосылған «Бижан» ет өңдеу зауыты Қазақстандағы  сату орындарын кеңейтуді, сонымен қатар өнімді экспорттауды жоспарлап отыр. Бұл туралы Индустриалды аймақтың баспасөз қызметі хабарлады.

«Алматының Индустриалды аймағындағы «Бижан» зауыты 2020 жылдың басында іске қосылды. 250 жаңа жұмыс орны ашылды. Өндірістің қуаттылығы күніне 20 тонна өнім шығаруға мүмкіндік береді. Кәсіпорынның тікелей жоспарларында HoReCa секторын қамту, Қазақстанның аймақтарында компанияның  сату пункттерін кеңейту және көрші елдердің нарықтарына шығу», - деп хабарлады баспасөз қызметі.

Компания Индустриалды аймақта ет, шұжық өнімдерін, консервілер, жартылай фабрикаттар мен ет өнімдерін арзан бағамен сататын дүкенін ашты: оның бағасы қаладағы бөлшек сауда дүкендерінен 15% -ға төмен.

«Біздің кәсіпорынның Көкшетауда қасапханасы бар. Сондай-ақ, ол жерде 1000  мал басына арналған бордақылау алаңы бар, ал жақында 5000 бас малға арналған орын жаңадан іске қосылады. Зауыттың негізгі шикізаты – ақ бас бұқалар. Өзіміз өсіріп, дайындайтын шикізаттың арқасында біз бәсекелесе алатын жақсы бағамен сапалы өнім шығара аламыз. «Бижан» ЕӨЗ компаниясы өнім сапасына назар аударатынын атап өткім келеді. Біз тек табиғи өнімдерді, етті пайдаланамыз. ГМО қолданбаймыз», - деді Бижан ЕӨЗ коммерциялық директоры Самат Давлетпаков.

Компания толықтай өндірістік циклді өзі жүзеге асырады, яғни мал  бордақылау, шикізат өндіру, мал сою, өңдеуден бастап дайын өнімді дүкен сөресіне дейін жеткізумен айналысады. Компания жоғары сапалы шұжықтардың 100-ден астам түрін шығарады: шикі ысталған, пісірілген ысталған, пісірілген өнімдер, ет деликатестері, жылқы етінің ұлттық өнімдері, жаңа піскен ет және ет өнімдері.

«Бижан» ЕӨЗ халықаралық сапа стандарттарына сәйкес келетін неміс, швейцариялық және итальяндық жабдықтарды қолданады. Барлық санитарлық нормаларға сәйкес келетін технологиялық процесс жаңа түрдегі көмпьютерлік бағдарламамен басқарылады, бұл шығынды азайтуға, өнімділікті арттыруға және өндірістік циклды автоматтандыруға мүмкіндік береді. «Бижан»  зауытының өнімдері «Мясной мир» бренді бойынша  Алматы, Нұр-Сұлтан және Көкшетау қалаларындағы компаниялардың дүкендерінде сатылады.

 
 

Узнавайте первыми самые свежие новости агробизнеса Казахстана на нашей странице в Facebook, канале в Telegram, подписывайтесь на нас в Instagram или на нашу рассылку.