Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Қазақстанның фермерлеріне картоп өсіруге арналған қытайлық техника таныстырылды
27 октября 2026
Star брендінің картоп өсіруге арналған техникасын, Irritech жаңбырлатып суару жүйелерін және Қытайда өндірілген басқа да ауыл шаруашылығы техникасын SinoTech Group компаниясы 21–23 қазанда Астанада өткен KazAgroFarm 2026 халықаралық көрмесінде таныстырды. Бұл техниканың басты артықшылығы – сапасына кепілдік беріле отырып, әлемнің жетекші өндірушілерінің техникасымен салыстырғанда бағасының төмен болуы. Бұл туралы ElDala.kz порталына SinoTech Group бас директоры Таир Шляков айтып берді.
– Біздің компания 2022 жылдан бері жұмыс істейді, – деді Таир Шляков. – Қытай техникасын жеткізуді енді бастаған кезде оның сенімділігіне қатысты, әсіресе Қазақстанның солтүстік өңірлеріндегі фермерлер тарапынан көптеген сұрақ туындады. Өйткені олар қымбат еуропалық және америкалық брендтердің техникасымен жұмыс істеуге үйренген. Алайда бес жылға жуық уақыт ішінде көптеген қытайлық брендтердің өзін жақсы қырынан көрсеткеніне көз жеткіздік. Біз де дәл осындай өндірушілермен жұмыс істеуге ұмтыламыз. Тағы бір маңызды мәселе – техниканың бағасы. Кез келген фермердің түпкі мақсаты – табыс табу. Сондықтан техникаға 500 млн теңге жұмсаудың орнына, шартты түрде айтқанда, 400 млн теңгеге сатып алуға мүмкіндік болса, бұл инвестицияның өтелуіне айтарлықтай әсер етеді.
SinoTech Group ауыл шаруашылығы техникасының кең түрін ұсынады. Дегенмен компания жұмысының негізгі бағыты – суару жүйелері мен картоп өсіру технологиялары. Компания картоп өндірісінің егіс егуден бастап өнімді сақтауға дейінгі толық цикліне арналған шешімдерді ұсынады. 2026 жылы өнім түрлері кеңейіп, Қазақстанға бункері бар тіркемелі комбайндар жеткізіле бастады. Фермерлердің бұл техникаға қызығушылығы жоғары, сондықтан SinoTech 2027 жылы сатылым көлемі артады деп күтеді.
– Біздің алғашқы комбайнымыз Алматы облысында жұмыс істеп жатыр, – деді Таир Шляков. – Менің ойымша, келесі жылы бұл комбайн сатылым көлемі бойынша өнім желісімізде бірінші орынға шығады. Себебі оның бағасы мен Еуропада өндірілген техниканың құны арасындағы айырмашылық өте үлкен. Жалпы, қытайлық техниканы сатып алу кезінде әлемдік жетекші өндірушілердің премиум санаттағы машиналарымен салыстырғанда далалық техникадан 30%-ға дейін, ал қойма техникасынан 50%-ға дейін үнемдеуге болады.
Лизинг және сервис
Қазір SinoTech компаниясы Қытайда өндірілген ауыл шаруашылығы техникасының сатылымын Қазақстанның бес өңірінде дамытуды жоспарлап отыр. Олар – Алматы, Жетісу, Қарағанды, Павлодар және Жамбыл облыстары. Мұндай географиялық қамту Павлодар мен Алматы қалаларында жұмыс істейтін екі кеңседен жедел сервистік қызмет көрсету мүмкіндігіне байланысты.
Компания мамандары сервистік қызмет көрсетумен қатар, техника таңдау бойынша кеңес беріп, оны пайдалану жөнінде оқыту жүргізеді.
Техниканың қаржылық қолжетімділігін арттыру үшін мемлекеттік қолдау құралдарын да пайдалануға болады.
– Біз ҚазАгроҚаржы-мен үш жылдан бері жұмыс істеп келеміз, сондай-ақ Аграрлық несие корпорациясымен де ынтымақтасамыз, – деді Таир Шляков. – Бұдан бөлек, былтырдан бастап өзіміздің BMT Finance лизингтік ұйымымыз жұмыс істейді. Алдағы уақытта осы бағытты одан әрі дамытуды жоспарлап отырмыз.
Сонымен қатар SinoTech-тен сатып алынған техника субсидиялау бағдарламасына қатыса алады. Оған берілетін субсидия нормативі Қазақстанда өндірілген техникаға қарағанда төмен болғанымен, бағасының арзандығын ескерсек, оны сатып алу тиімді.
Өріске жақын
SinoTech Group өз қызметтерін түрлі алаңдарда танытуға ерекше көңіл бөледі. Сондықтан компания Қазақстандағы көрмелер мен егіс алқаптарындағы көрсетілімдерге тұрақты қатысып, семинарлар мен кездесулер ұйымдастырады. Мұндағы мақсат – өнімдері туралы ақпарат беріп қана қоймай, фермерлердің пікірін тыңдау.
– Көрмелер – аграршылармен танысып, ақпарат алмасуға өте қолайлы алаң, – деп атап өтті Таир Шляков KazAgroFarm көрмесі аясында.
Компания аграршыларды ынтымақтастыққа шақырып, бұрыннан келе жатқан және жаңа серіктестерімен бірге жаңа аграрлық маусымға қадам басуға дайын.
