Қазақстанда ауыл шаруашылығы жерлерін беру цифрлық форматқа көшеді

Фото көзі: ElDala.kz

Қазақстанда топырақты қорғау мәселелері бойынша заңнамаға өзгерістер әзірленді. Ауыл шаруашылығы жерлерін беру цифрлық форматқа ауыстырылады деп жоспарлануда. Сондай-ақ, өзгерістер тұтастай алғанда бөлу рәсімдерінің ашықтығын арттыруға бағытталған. Бұл туралы Мәжілістің баспасөз қызметі хабарлады.

Осы заң жобасы бойынша Мәжілістегі жұмыс тобының отырысында ауыл шаруашылығы вице-министрі Азат Сұлтанов Жер кодексінің бірқатар нормаларының жаңа редакциясы көзделіп отырғанын хабарлады.

«Түзетулердің негізгі мақсаты - жер комиссияларын тарату және электрондық конкурстарға толық көшу есебінен ауыл шаруашылығы жерлерін бөлудің ашықтығын қамтамасыз ету. Бұл ретте Кодекстің негізгі ережелері, соның ішінде жер пайдаланушылардың міндеттері мен қосымша балл беру жүйесі сақталады», - деп түсіндірді вице-министр.

Конкурстарды өтінім беруден бастап жеңімпазды анықтауға дейінгі рәсімдерді толық автоматтандырумен мемлекеттік мүлік тізілімінің веб-порталында өткізу жоспарлануда.

Жаңа тетік байқау мерзімін 90 күнтізбелік күннен 45 күнге дейін қысқартуды, байқау ұсыныстары мен бизнес-жоспарларды дайындау қажеттілігінсіз проактивті қатысу форматына көшуді және жеңімпазды автоматтандырылған жүйе негізінде анықтауды ұсынады. Қосымша «екінші жеңімпаз» тетігі және жалдау шартына қол қоюдан жалтарған адамдар үшін шектеулер енгізіледі.

Заң жобасын қарау кезінде жергілікті атқарушы органдардың инфрақұрылымның, кадрлық әлеуеттің және цифрлық платформаның әзірлік деңгейінің болуын, сондай-ақ цифрлық тетікті енгізу кезіндегі ықтимал тәуекелдер мен шектеулерді қоса алғанда, конкурстар өткізуге дайындығы талқыланды. Маусымдық ауыл шаруашылығы жұмыстарын ескере отырып, конкурс мерзімдерін қысқартуға, балл беру тәртібіне және «ісін жаңа бастаған кәсіпкерді» айқындау өлшемшарттарына ерекше назар аударылды.