Түркияға Kazbeef және Ақтөбе ет кластерінің өнімдері ұсынылды

ҚР Ауыл шаруашылығы министрі Сапархан Омаров Түркияға жұмыс сапары кезінде аталған елдің Ауыл және орман шаруашылығы министрі Бекир Пакдемирлимен кездесті. Екі ел агроөнеркәсіптік кешендегі бірлескен инвестициялық жобаларды іске асыру және одан әрі ынтымақтастықта жұмыс істеу жайлы талқылады, атап айтқанда, қазақстандық министр былғары мен жүн өңдеуді бірлесіп дамытуды ұсынды. Бұл туралы ҚР Ауыл шаруашылығы министрлігінің баспасөз қызметі хабарлады

Келіссөздер барысында Сапархан Омаров Kazbeef компаниясы мен «Ақтөбе ет кластерін» ауыл шаруашылық өнімдерін экспорттаушылар тізіміне қосу мәселесін көтерді. Ол сондай-ақ Қазақстанның сауда-логистикалық инфрақұрылымын құру, сапалы және қол жетімді азық-түлік өнімдерін шығару және ауыл шаруашылық шикізатын қайта өңдеу саласындағы ынтымақтастықты дамытуға ынталы екендігін білдірді.

Тақырыпқа байланысты оқу: KazBeef қытай нарығына шығуды жоспарлауда

«Қазақстан Түркияның тоқыма өнеркәсібін, былғары мен жүнді өңдеу саласындағы тәжірибесін жоғары бағалайды. Қазақстандық тарап бірлескен жобаларды жүзеге асыруға қызығушылығын танытты, өйткені шикізат көлемі жеткілікті», - деді Сапархан Омаров.

Сондай-ақ, ол түрік ғылыми-зерттеу ұйымдарымен аграрлық ғылым саласындағы бірлескен зерттеулер үшін тығыз ынтымақтастық орнатуды ұсынды.

Сонымен бірге, ҚР Ауыл шаруашылығы министрлігінің басшысы түрік инвесторларының қатысуымен жүзеге асырылған агроөнеркәсіптік кешендегі бірқатар сәтті орындалып жатқан жобалар мен 500 млн долларға істелген 13 жаңа инвестициялық жобаларды атап өтті.

«Түркия - біздің ұзақ мерзімді стратегиялық серіктесіміз. Біз ауыл шаруашылығы саласындағы екіжақты ынтымақтастықты кеңейтуге және өзара тиімді шарттар бойынша тауар айналымын ұлғайтуға үлкен мән береміз. Екі елдің арасындағы сауданы дамытудың үлкен болашағы бар», - деп атап өтті Ауыл шаруашылығы министрлігінің басшысы.

 

Тақырыпқа байланысты оқуҚР компаниялары өнімдерін Түркияға шығару үшін олардан «Экспорттаушы карточкасы» талап етіледі

Сонымен қатар, баспасөз қызметінің хабарлауынша, Сапархан Омаров Түркиядағы ірі агроөнеркәсіптік кәсіпорындардың басшыларымен кездесті. Кәсіпкерлерге Қазақстанның агроөнеркәсіптік кешенін дамытудың басым бағыттары таныстырылды, оларға саланы мемлекеттік қолдау шаралары және қазақстандық агроөнеркәсіптің инвестициялық тартымдылығы туралы айтылды.

Атап айтқанда, ауыл шаруашылық өнімдерінің негізгі әлемдік нарықтарына тікелей қол жеткізуді қамтамасыз ететін Қазақстанның қолайлы географиялық орны атап өтілді.

Кездесу соңында министр түрік кәсіпкерлерін ауыл шаруашылығы және өңдеу өнеркәсібінде ынтымақтастықта істеуге және бірлескен жобаларды жүзеге асыруға шақырды.

 

Узнавайте первыми самые свежие новости агробизнеса Казахстана на нашей странице в Facebook, канале в Telegram, подписывайтесь на нас в Instagram или на нашу рассылку.