«Бәйтерек» компаниясы арқылы АӨК-тегі инвестициялық жобаларға 100 млрд теңге бөлінеді

Жұмыспен қамтудың жол картасы (ЖҚЖК) аясында биыл 300 млрд теңгенің бір бөлігі агроөнеркәсіптік кешендегі жобаларды іске асыруға жұмсалатын болады. Бұл туралы ҚР Премьер-Министрінің баспасөз қызметі хабарлады.

Бүгін үкімет отырысында премьер-министр Асқар Мамин айтқандай, ағымдағы жылы ЖҚЖК -ны жүзеге асыру бойынша инфрақұрылымдық жобаларды, кәсіпкерлікті және ауылшаруашылықты дамыту арқылы тұрақты жұмыс орындарын құруға ерекше назар аударылатын болады.

Атап айтқанда, «Байтерек»ҰБХ арқылы агроөнеркәсіптік кешендегі инвестициялық жобаларды қаржыландыруға 100 млрд теңге жұмсау жоспарланып отыр. Сондай-ақ, аймақтарда жолдарды, медициналық және білім беру ұйымдарын салуға және жөндеуге бағытталған 127,5 млрд.теңгеге инфрақұрылымдық жобалар іске асырылатын болады. «Атамекен» ҰКП және әкімдіктердің қатысуымен микроқаржы ұйымдары арқылы 22,5 млрд.теңге сомасындағы бизнес-жобаларды қаржыландыру жоспарлануда. Өңірлердегі кәсіпкерлікті дамытуға 50 млрд. теңге бағытталады.

Еңбек және халықты әлеуметтік қорғау министрі Серік Шапкенов түсіндіргендей, «Бәйтерек» холдингі арқылы АӨК-ті қаржыландыруға 100 млрд теңге субсидия қарыз алушыларға 6% -ға дейінгі мөлшерлемемен берілетін болады. Жобалар келесі шарттар бойынша таңдалды: жұмыспен қамтуды қолдау және жұмыс орындарын құру; тамақ өнімдері импортын қысқарту.

Аталған жобалар 2,2 мыңдай уақытша және 3,8 тұрақты жұмыс орындарын құруды көздейді.

Тақырыпқа байланысты оқу: АӨК-ті дамытудың бес жылдық ұлттық жобасына 4,9 трлн тенге бөлінеді

Осы мәселеге орай, үкімет басшысы Ауыл шаруашылығы министрлігіне Еңбек және халықты әлеуметтік қорғау министрлігімен, сондай-ақ басқа да жауапты мемлекеттік органдармен бірлесіп, ауылшаруашылық жобаларын қаржыландыру жөніндегі іс-шаралардың тиімділігін бағалау есептерін әзірлеуді тапсырды.

«Тұрақты жұмыс орындарын құру ерекше бақылауда болуы керек», - деп атап өтті Асқар Мамин.