Шетелдік ірі компаниялар Қазақстанның АӨК саласына $3,9 млрд қаражат салады

Елдегі уәкілетті мемлекеттік органдар құны жоғары ауылшаруашылық жобаларына шетелдік инвестицияларды қатыстыру мақсатында жоспар құрды. Қазіргі таңда 38 жобаны жүзеге асыруға қатысты келісімдер жасалды. Бұл туралы Мәжіліс депутаттарының сауалына жауап бере отырып, ҚР Премьер-Министрінің орынбасары - Сыртқы істер министрі Мұхтар Тілеуберді мәлімдеді.

«Бүгінгі таңда ірі шетелдік инвесторлармен құны $3,9 млрд болатын агроөнеркәсіптік кешенде 38 жоба әзірлеу туралы бірқатар келісімдер жасалды, жалпы алғанда ауылшаруашылығына 4,55 трлн теңге болатын 845 инвестициялық жоба жасалатын болады. Қарастырылып отырған келісімдер бүкіл саланы, оның ішінде тамақ өнімдерін өндіруді қамтамасыз ететін болады», - деді СІМ басшысы.

Қазақстан Ұлттық Банкінің мәліметтері бойынша, 2020 жылы ауылшаруашылығы $12,6 млн, ал азық-түлік өндірісіне $203,5 млн инвестиция салынды, осылайша өткен жылы агроөнеркәсіптік кешенге $216 млн шетелдік инвестиция тартылды. Бұл көрсеткіш 2019 жылмен салыстырғанда 43,9% артық.

Тақырыпқа байланысты оқу: Қазақстанға Tyson Foods ет комбинаты не үшін қажет

Сонымен қатар Сыртқы істер министрлігі Қазақстанда жыл сайын агроөнеркәсіптік кешенде өндірісті ұйымдастырумен айналысатын трансұлттық компаниялардың саны артып келе жатқанын атап өтті. Олардың ішінде агро-протеин кластерін ұйымдастыруға қатысатын (Tyson Foods АҚШ, Valmont АҚШ), картоп өндіру және қайта өңдеу (Farm Frites; Нидерланды), ет комбинатын салу (Cedar Meats; Австралия) сияқты маңызды жобалар бар. Сондай-ақ, өндірістік жылыжайлар (Эко-Культура РФ), жемістерді қайта өңдеу (Goknur Gida Түркия) және тағы басқа да компаниялар бар.

«Агроөнеркәсіптік кешенге шетелдік инвестиция салу арқылы жергілікті экономиканы дамыту және жаңартуға болады, жаңадан білікті жұмыс орындарын ашуға мүмкіндік туады, сондай-ақ қазақстандық өнімді сыртқы нарыққа шығаруға болады», - деді Мұхтар Тілеуберді.