Қазақстан Ауғанстанға ұн мен астықты қайта тасымалдай бастады

Қазақстандық астық тасымалдаушылар тамыз айында Ауғанстан еліндегі билік ауысқаннан кейін бұл елге астық пен ұн жөнелту проблемасына тап болды. Қазіргі уақытта вагондардың ақысын төлеу және көліктерді кері қайтаруға қатысты басты  мәселелер шешілді, бұл экспортты қайта жандандыруға мүмкіндік берді. Бұл туралы бүгін өткен брифингте ҚР Ауыл шаруашылығы министрлігі Өсімдік шаруашылығы өнімдерін өндіру және қайта өңдеу департаментінің директоры Азат Султанов мәлімдеді.

«Біздің еліміз үшін Ауғанстан ұн және астық алу бойынша негізгі нарық болып табылады. Соңғы саяси оқиғалар аясында бұл елде өнімдерді жөнелтуде вагондар тоқтап тұрған болатын. Қазіргі уақытта, бизнес пен тасымалдаушылардың ақпаратына сәйкес, аталған қиындықтар шешіліп, көліктерді жөнелту бойынша мәселе жоқ», - деп хабарлады Азат Сұлтанов.

Сала басшысының айтуынша, Ауғанстанмен үкіметтік деңгейде өнімдерді экспорттау бойынша алдағы уақытқа  әзірге келіссөздер жоспарланбаған. Жағдай қалыптасқан кезде бизнес байланыстар аясында барлық мәселелерді шешуге мүмкіндік болады.

«Қазақстан мен Ауғанстанның бизнес-серіктестері тұрақты қарым-қатынас орнатқан. Қазіргі таңда Ауғанстан бағытында өнім жөнелтілуде. Нақтылап айтатын болсақ, қазіргі таңда 199 мың тонна ұн мен 33 мың тонна астық жөнелтілді. Яғни, негізінен ұн тасымалдануда», - деп нақтылады Азат Сұлтанов.

Тақырыпқа байланысты оқу: Ауғаныстандағы дағдарыс Қазақстанға әсер етуі мүмкін бе?

Айта кетейік, Ауғанстан қазақстандық ұнды негізгі сатып алушыларының бірі болып табылады. ҚР Қаржы министрлігі Мемлекеттік кіріс комитетінің мәліметінше, 2020 жылы Қазақстан бұл елге 527 мың тонна бидай, 12 мың тонна басқа да астық, 31,6 мың тонна майлы дақылдар және 1 млн 150 мың тонна ұн экспорттады. 2021 жылдың бірінші жартысында трейдерлер Ауғанстанға 328 мың тонна бидай, 3,6 мың тонна басқа да астық түрлерін, 9,4 мың тонна майлы дақылдар және 430 мың тонна ұн жіберді.

Ауғанстандағы билік ауысқаннан кейін қазақстандық бизнесмендер келісімшарттарды тоқтатуға мәжбүр болды. Өз кезегінде тасымалдаушылар вагон жөнелтілуінің нашарлауына байланысты осы бағытта астық тасымалдауды шектеген болатын.

Бизнес саласында туындаған қиындықтары мен мәселелерге қарамастан, Ауыл шаруашылығы министрлігінің болжамы бойынша Ауғанстан биылғы маусымда ұн мен бидайды негізгі сатып алушылардың қатарында қалады. Сондай-ақ, басқа да нарықтарға - Орта Азия елдері мен Иранға экспорт сақталады. Биылғы жылы жиналған астықтың сапасының жоғары болуына байланысты үкімет HI-Pro бидайының Қытайға жөнелтілуі мүмкін деген мәлімет айтылуда.

Жалпы Қазақстанда астықтың экспорттық әлеуеті жаңа маусымда 6 - 6,5 млн тонна көлемінде болады деп болжам айтылуда.