Астық өнімділігі өткен жылғыдан 35% -ға төмен

Биылғы маусымның ауа райы дәнді дақылдардың шығымдылығына кері әсерін тигізді. Ауыл шаруашылығы министрлігінің бағалауынша, ол өткен жылдың осындай  кезеңімен салыстырғанда 35% -ға төмен. Бұл туралы бүгін Үкімет отырысында министр міндетін атқарушы Ербол Қарашукеев хабарлады.

«Ағымдағы жылы бірқатар өңірлерде жауын-шашынның болмауы атмосфералық температураның жоғары болуына да әсер етті, сондай-ақ оңтүстік облыстарда су аз болуда. Аталған жағдайлар күздік дәнді дақылдардың өнімділігіне кері әсер етті. Облыс әкімдіктерінің жедел мәліметтері бойынша биылғы жылдың 1 тамызындағы жағдай бойынша дәнді дақылдардың орташа түсімділігі 12,3 ц/га құрады, бұл өткен жылдың осы мерзіміндегі түсімділіктен 35% -ға аз», - деп хабарлады ведомство басшысы.

Тақырыпқа байланысты оқу: «Егістіктен 10 ц/га жинау жоспарлануда»

Жалпы, ол ағымдағы жылдың қаңтар-шілде айларында ауыл шаруашылығының жалпы өнім көлемі 2,4% -ға артып, 1 997,3 млрд теңгені құрағанын атап өтті. Өсім негізінен мал шаруашылығындағы өндіріс көлемінің 3,4% -ға ұлғаюы есебінен қамтамасыз етілді. Бұл ретте өсімдік шаруашылығы өнімдері 296,6 млрд теңгеге өндірілді, бұл көрсеткішті нақты санмен айтсақ, өткен жылғы деңгейден 3,1% -ға төмен.

Мал мен құс санының өсуі байқалады. Жыл басынан бері ІҚМ басы 4,8% -ға, 9 млн басқа дейін, қой мен ешкі 2,5% -ға, жылқы 9,4% -ға, құс 7,1% -ға өсті. Тірі салмақтағы ет өндірісі 5,4%, сүт өндірісі 3,3% артты.

Аталған кезеңде азық-түлік өндірісі 3,9% -ға өсіп, 1 228,4 млрд теңгені құрады. Қант өндірісі 3,1 есеге, өңделген күріш 27,3% -ға, жарма 18% -ға, сары май 17,3% -ға, ашытылған сүт өнімдері 4,1% -ға, өсімдік майы мен ұн 2,4% -ға, ірімшік пен сүзбе 2% -ға, өңделген сүт 1,4% -ға өсті.

Ағымдағы жылдың қаңтар-шілде айларында ауыл шаруашылығының негізгі капиталына салынған инвестициялар көлемі 45,5% -ға, 386,1 млрд теңгеге дейін, азық-түлік өндірісі - 5,9% -ға, 49,2 млрд теңгеге дейін ұлғайды.