Тоқаев жұмыс сапарымен астықты алқаптарды аралады

Бүгін Қазақстан Республикасының Президенті Қасым-Жомарт Тоқаев Қостанай және Солтүстік Қазақстан облыстарында болып, фермерлермен бірқатар кездесулер өткізді. Бұл туралы Ақорданың баспасөз қызметі хабарлады.

Қостанай облысында Мемлекет басшысы «Милх» ЖШС-да болып, балмұздақ пен сүт өнімдерін шығаратын өндіріс желілерін аралады. Заманауи қондырғылар тәулігіне 130-150 тонна сүтті өңдеуге мүмкіндік береді. Компания өнімнің 30% -ын Ресейдің көрші аймақтарына экспорттайды. Шикізат сатып алу облыстың 12 мыңнан астам жеке қосалқы шаруашылығын қамтыды.

Сондай-ақ, Мемлекет басшысы егістік алқаптарды аралап, «Заречное ауыл шаруашылық тәжірибе станциясы» ЖШС-да егін жинау науқанының барысымен танысты. Бүгінгі күні жалпы Қостанай облысында 3,1 млн га астық бастырылды немесе 76%, әр гектардан 10 центнерден өнім алуда. Жұмысқа 9 100 комбайн қолданылуда, астық жинау науқаны жақын арада аяқталады.

Ауыл шаруашылық тауар өндірушілерімен кездесу барысында Қасым-Жомарт Тоқаев аграрлық сектордың табысты дамуы республиканың бүкіл экономикасының бәсекеге қабілеттілігін анықтайтынын атап өтті. Әңгіме барысында ауыл шаруашылық өнімдерінің маркетингі мен экспортына баса назар аударылды.

«Өндіру ісі бір мәселе болса, екінші маңызды нәрсе өнімді  нарыққа шығару ісі болып табылады. Бұл мәселелерді үкімет шешуі керек. Қазір біз Еуразиялық экономикалық одақ аясында нақты мәселелерді шешіп жатырмыз. Қараша айында президенттердің бастамасымен шекаралас облыс басшыларының аймақтық кеңесі өтеді. Пандемияға байланысты біз әлі қандай форматта болатынын білмейміз. Жалпы, біздің ЕАЭО елдерінде интеграцияны дамыту жүзеге асырылатын болады», - деді Тоқаев.

Сонымен қатар, бүгін Президент Солтүстік Қазақстан облысына келді, онда «Аби Жер» ЖШС-да егін жинау науқанының барысымен танысты. Облыс әкімі Құмар Ақсақалов хабарлағандай, облыста ауыл шаруашылығын әртараптандыру бойынша жұмыс қарқынды жүруде. Майлы дақылдардың ауданы 1 миллион гектарға жуықтайды. Жыл басынан бері аграрлық секторға 61 миллиард теңге жұмсалды.

Сондай-ақ әкімі хабарлағандай, Солтүстік Қазақстан облысы минералды тыңайтқыштарды енгізу бойынша республикада жетекші орын алады. Биылғы жылы 2,3 миллион гектар алқапқа 130 мың тонна тыңайтқыш енгізу жоспарланған.

Сонымен қатар, облыста ауыл шаруашылық техникалары жаңартылуда, нәтижесінде өндіріс өсуде. Болашақта CLAAS неміс концерні Петропавл қаласында техникалар құрастыратын болады.

Фермерлермен кездесу барысында Қасым-Жомарт Тоқаев Солтүстік Қазақстан облысы - бұл әлемдік нарықта сұранысқа ие экологиялық таза табиғи астық өсіретін еліміздің маңызды өңірі екенін атап өтті.

«Ендігі басты міндет –қолда бар егінді жинап теру. Ауыл шаруашылық дақылдарын  әртараптандыру, әсіресе экспорт тұрғысынан өте маңызды.Үлкен нарықтар бар және  Қытай нарығы да СҚО өнімдерін жоғары бағалайды. Менің ойымша, өте жақсы мүмкіндіктер бар. Өңірдің болашағы негізінен керемет», - деді Мемлекет басшысы.

Кездесу соңында Қасым-Жомарт Тоқаев фермерлерге уақытылы егін жинауларына тілектестік білдіріп, жұмыстарына сәттілік тіледі.