Біздің парақшамыздан Қазақстандағы агробизнестің соңғы жаңалықтарын бірінші болып біліп отырыңыз Facebook, арнада Telegram, бізге жазылыңыз Instagram немесе біздің пошталық жіберу.
Түркістан облысында шитті мақта тоннасына 230 мың теңгеден сатып алынады
09:15
Түркістан облысының фермерлері ағымдағы жылы шитті мақтаның сатып алу бағасына наразылықтарын білдірген болатын. Олардың айтуынша, өндірістік шығындарды ескергенде, қазіргі баға шаруашылықтардың табыстылығын қолайлы деңгейге жеткізуге мүмкіндік бермейді.
Жақында Түркістан облысының әкімдігі мақтаны сатып алу бағасына қатысты түсініктеме берді. Фермерлермен кездесуде өңір әкімі Нұралхан Көшеров биыл шитті мақтаның бастапқы сатып алу бағасы 1 келісі үшін 230 теңге болып белгіленгенін хабарлады. Алайда нарық конъюнктурасына қарай баға кейін өзгеруі мүмкін. Өйткені оған халықаралық баға белгіленімдері мен валюта бағамының өзгеруі әсер етеді. Сондықтан ішкі нарықтағы бағаны тек жергілікті деңгейдегі шешіммен белгілеу мүмкін емес, деді әкім.
«Мақтаның бағасы әлемдік нарықтағы жағдайға байланысты қалыптасады. Бұл ретте халықаралық нарықтағы баға белгіленімдері мен валюта бағамы ескеріледі. Доллармен есептегенде, биылғы баға өткен жылмен салыстырғанда жоғары. Сондықтан баға мәселесін осы факторларды ескере отырып бағалау қажет», – деді Нұралхан Көшеров.
Әкімдіктің мәліметінше, биыл шитті мақтаның бір тоннасы 510–511 доллардан сатып алынуда. Ал 2025 жылы бұл көрсеткіш 480–482 доллар болған.
Сондай-ақ Нұралхан Көшеров өңірде мақта өсіруге мемлекет тарапынан ауқымды қолдау көрсетіліп жатқанын, сонымен қатар салаға қойылатын талаптар да өзгеріп жатқанын айтты. Атап айтқанда, мақта өңдеу кәсіпорындары шикізатты қабылдау кезінде өнім сапасына қойылатын талаптарды күшейтіп отыр. Өнімнің сапасы, тазалығы, ылғалдылығы және басқа да көрсеткіштері оның нарықтағы құнына тікелей әсер етеді.
«Біз фермерлерге бірнеше жылдан бері бір нәрсені айтып келеміз: заман өзгерді, нарық талаптары да өзгерді. Енді мақтаны бұрынғы тәсілмен өсіріп, бұрынғы әдіспен жинау жеткіліксіз. Біз сапаға, өнімділікке, суды үнемдеуге және заманауи технологияларды қолдануға басымдық беруіміз керек», – деді облыс әкімі.
Нұралхан Көшеров «Түркістан агроөнеркәсіп кешені» компаниясының тәжірибесіне назар аударды. Компания тың жерлерге мақта егіп, тамшылатып суару технологиясын енгізіп, жергілікті фермерлерге заманауи агротехнологияларды үйретіп келеді. Нәтижесінде компания гектарына 65 центнерге дейін өнім алуға қол жеткізген. Ал дәстүрлі әдіспен жұмыс істейтін жергілікті шаруашылықтарда орташа өнімділік гектарына 20–25 центнер деңгейінде қалып отыр.
Бұл тәжірибенің басты маңызы – суды тиімді пайдалану, еңбек өнімділігін арттыру және мақта өсіру саласын технологиялық жаңғырту. Облыс әкімі фермерлерге суды үнемдейтін технологияларға біртіндеп көшу қажеттігін ескертті.
Биыл Түркістан облысында мақта егістігінің көлемі 173,6 мың гектарға жетті. Бұл 2025 жылмен салыстырғанда 29,1 мың гектарға көп. Маусым қорытындысы бойынша 555 мың тоннадан астам шитті мақта жинау жоспарланып отыр. Қазіргі уақытта 94,6 мың гектар алқаптан 283 мың тонна мақта жиналған.
