Азық-түлік корпорациясына астық тұқымдарын импорттайтын оператор қызметі беріледі

ҚР Үкіметі «Азық-түлік келісім-шарт корпорациясы» ұлттық компаниясының 2021-2030 жылдарға арналған даму стратегиясын бекітті. Аталған құжат компания қызметін біршама кеңейтетін болады, оның міндеттерінің бірі ішкі нарықты жоғары сапалы астық тұқымымен қамтамасыз ету болып табылады.

«Елдің ішкі нарығын сапалы тұқыммен қамтамасыз ету мақсатында Азық-түлік корпорациясы тұрақты түрде қажетті тұқым қорын қалыптастыру үшін өсімдік өнімінің жоғары сапалы тұқымдарын сатып алуды жоспарлап отыр. Отандық ауыл шаруашылығы өнімін  арттыру және тұқым шаруашылығын дамыту үшін Азық - түлік корпорациясы тұқым материалын импорттайтын болады. Сондай-ақ тұқым өндіру ауқымын одан әрі кеңейту үшін тұқым өсіру шаруашылықтарына сату жөніндегі оператор ретінде әрекет ететін болады», - деп көрсетілді Ұлттық компанияның стратегиясында.

Бұдан басқа, отандық ҒЗИ-мен бірлесе жұмыс істей отырып, азық-түлік корпорациясы  жоғары өнімділікті қамтамасыз ететін болады. ҚР-дағы климаттық және басқа да сипаттамаларға қарай өсіруге неғұрлым қолайлы дақылдардың жаңа шетелдік сұрыптарына мониторинг жүргізеді.

Импорттық тұқымдық материалды Азық-түлік корпорациясы аттестатталған тұқым өсіру шаруашылықтарына сатуды көздеп отыр. Ал олар өз кезегінде элиталық және бірінші сұрыпты тұқымдарын өткізеді. Кейіннен бұл тұқымдар егіс жұмыстарын жүргізу үшін көктем кезінде аграршыларға берілетін болады, олар егін жинағаннан кейін тауарлық астық түрінде төлем жасай алады.

Ауыл шаруашылығы өндірушілеріне берілетін тауарлық астықты сатудан түскен қаражат жаңа жоғары сапалы тұқымдарды импорттау үшін пайдаланылады.

Сонымен қатар, стратегияға сәйкес, отандық аграрлық ғылымды ынталандыру үшін Азық-түлік келісім-шарт корпорациясы күзде астықпен қайтару шарттары бойынша ауыл шаруашылығы өндірушілеріне кейіннен беру мақсатында шаруашылықтардан өсімдіктің жоғары сапалы тұқымдарын сатып алуды жоспарлап отыр.

Ішкі нарықты жоғары сапалы тұқыммен қамтамасыз ету үшін Азық-түлік корпорациясы нарықта жоғары сапалы тұқым сатып алуға ауыл шаруашылығы өндірушілерін көктемгі-жазғы қаржыландыру түрінде форвардтық сатып алу тетігін пайдаланады.

Азық-түлік келісім-шарт корпорациясының жаңа Даму стратегиясы 2021 жылдың 1 қаңтарынан бастап қолданысқа енгізіледі.

Айта кетсек, Азық-түлік келісім- шарт корпорациясының стратегиясы бойынша, бағаны тұрақтандыру үшін астық нарығында интервенцияны  жүзеге асыратын болады. Астық өндірушілердің сараптамалық пулы құрылып, Өзбекстанда сауда өкілдігі мен АҚК ашылатын болады. Сондай-ақ ауыл шаруашылығы өнімдері нарығындағы сауда-саттық қызметі жанданатын болады.