Астық экспорттына баж салығы салынбайды - Тоқаев

ҚР Президенті Қасым-Жомарт Тоқаев астыққа экспорттық баж салығын енгізуді ерте деп санайды. Бұл туралы ол Солтүстік Қазақстан облысына жұмыс сапары бойынша фермерлермен кездесуде мәлімдеді, деп хабарлады Ақорданың баспасөз қызметі.

Ауыл шаруашылығы құрылымдарының басшыларымен және механизаторлармен әңгімелесу барысында Қасым-Жомарт Тоқаев қолайлы тарифтік саясат қажеттігін атап өтті. Сонымен қатар, ол дайын өңделген өнім, атап айтқанда, ұн экспортының төмендеуіне алаңдаушылық білдірді.

«Біз әдеттегідей ұнды Өзбекстан, Түрікменстан, Ауғанстан нарықтарына жеткіземіз. Жалпы үкімет, сауда министрлігі тарифті реттеу мәселелерімен неғұрлым жан-жақты айналысуы тиіс деп есептеймін. Үкімет болашақта астыққа экспорттық баж салығын енгізу туралы мәселе қойып отыр. Бірақ қазір қалыптасқан жағдайды ескере отырып, мұны енгізу ерте деп ойлаймын. Сондықтан бізге тауар өндірушілерге, әсіресе ұн өндірушілерге көмектесу үшін субсидия тетігін енгізу қажет. Біз қосымша құны жоғары дайын, өңделген өнімдерді жеткізуіміз керек», - деп атап өтті Қасым-Жомарт Тоқаев.

Ол сондай-ақ жақында жасалған Жолдау аясында аграрлық саланы дамыту бойынша бірқатар міндеттер қойғанын еске салды.

«Бізге субсидиялар саласындағы саясатымызды жетілдіріп, ретке келтіру керек. Бұл туралы мен Жолдауда айттым, бұл жерде бәрі анық болуы тиіс. Болашақта субсидиялар болмайды, оның орнына төмен пайызбен несиелер берілетін болады деген пікірлер бар. Бірақ қазір біз ауыл шаруашылығы өндірушілеріне көмектесуіміз керек», - деді Мемлекет басшысы.

Тақырыпқа байланысты оқу«Өзбекстанға жіберілетін бидай бағасы $295 болады»

Сонымен қатар, президент агроөнеркәсіптік кешенді озық техникамен қамтамасыз ету қажеттігін мәлімдеді.

«Үкімет тарапынан аграршыларға осындай техникамен қамтамасыз етуге көмек көрсетілуі тиіс. Егер заманауи техника болмаса, біздің ауыл шаруашылығымыз дамымайды. Бұл анық. Сондықтан үкімет менің тапсырмам бойынша тиісті саясатты жүзеге асыруды жалғастырады. Екіншіден, бұл техника барлық шаруалар үшін қолжетімді болуы тиіс. Несиелер жайлы айтатын болсақ, бұл саясат жалғасатын болады. Кредиттік мөлшерлеме төмен болуы тиіс. Мен бұл мәселеге үлкен мән беремін», - деді Президент.

Узнавайте первыми самые свежие новости агробизнеса Казахстана на нашей странице в Facebook, канале в Telegram, подписывайтесь на нас в Instagram или на нашу рассылку.

article