Қазақстанда 10,3 млн тонна астық бастырылды

Қазақстанда бүгінгі таңда 11,8 млн га астық және бұршақ тұқымдас дақылдар орылды немесе егістік алқабының 74,3% жиналды. Орташа өнімділігі 8,7 ц/га жердегі 10,3 млн тонна астық бастырылды. Бұл туралы ҚР Премьер-Министрінің баспасөз қызметінен хабарлады.

Бүгін Премьер-Министр Асқар Мамин Ақмола облысындағы егін жинау жұмыстарының барысын тексерді. Аталған өңірде жаздық егіс көлемі 5 млн га құрады, оның ішінде дәнді және бұршақты дақылдар 4,5 млн га (өсім 108,4 мың га), майлы дақылдар - 266,5 мың га (+ 56,8 мың га), жүгеріні есептегендегі жемшөп дақылдары - 191,4 мың га (+ 6,1 мың га), картоп - 20,6 мың га, көкөніс - 3,5 мың га.

Тақырыпқа байланысты оқу: ҚР-да астық бағасы 24%-ға өсті

Қазіргі таңда Ақмола облысы бойынша 3,5 млн га егістік немесе 78% алқап жиналды. Орташа өнімділігі 8 ц/га болатын 2,8 млн тоннадан астам астық жиналды.

Сондай-ақ өңірде 1,2 млн тонна шөп (жоспарланған көлемнің 95%), 176 мың тонна пішен (жоспардың 72%), 43 мың тонна сүрлем (23%), 152 мың тонна сабан (15%) дайындалды. Ауа райы қолайлы болған жағдайында егін ору науқанын қыркүйек айының соңына дейін аяқтау жоспарлануда.

Бұдан бұрын АШМ хабарлағандай, биылғы жылы астықты жалпы жинаудың болжамды көлемі 15,3 млн тонна ору жоспарлануда.

Азық-түлік корпорациясының ресурстарына форвардтық сатып алу аясында астық жеткізу көлемі 769,5 мың тоннаға келісім-шарт жасалды. Азық-түлік корпорациясының резервтік астық қоры 448 мың тоннаны құрайды. Астықтың жиналған көлемі қажет болған жағдайда оны тұрақтандыру және азық-түлік қауіпсіздігін қамтамасыз ету мақсатында ішкі нарыққа жұмсалатын болады.