СҚО-дағы өндірушілер газ тапшылығына тап болды

Бірқатар өңірлердегі ауыл шаруашылығы өнімдерін қайта өңдеушілер энергия ресурстарымен сауда-саттық электрондық алаңға өткізілгеннен кейін газ тапшылығына тап болды. Атап айтқанда, Солтүстік Қазақстан облысындағы өндірушілер жағдай қиын деп мәлімдейді. Бұл туралы «Атамекен» кәсіпкерлер палатасы хабарлады.

«Өнеркәсіптік тұтынушылар үшін газ тапшылығы қиын болуда, атап айтқанда, олар макарон фабрикалары, сүт зауыттары, құс фермалары, ауыл шаруашылығы тауарларын өндірушілер, сондай-ақ элеваторлар (астық кептіргіш), наубайхана иелері. Олар өз өндірістерінде сұйытылған газды энергия көзі ретінде пайдалануға көшкен», - деп мәлімдеді СҚО кәсіпкерлер палатасының өңірлік кеңесінің төрағасы,  «Горгаз-сервис» директоры Олег Иванов.

Тақырыпқа байланысты оқу: Жаңбырсыз қалай 20 ц/га алуға болады

Қазақстанда сұйытылған мұнай газы ішкі нарыққа тікелей және электрондық сауда арқылы екі әдіспен бөлінеді. Егер бұрын электронды алаңдар арқылы жалпы республикалық көлемнің 10% -ы бөлінсе, ағымдағы жылы 65% -ы болды. 2022 жылдың 1 қаңтарына қарай бұл көлем 100% -ға жетуі тиіс.

Электрондық сауда-саттық жүргізу ережелері бойынша сұйытылған газ әкімшілік өңірлер бойынша емес, макроөңірлер деп аталатын аймақтар бойынша бөлінеді. Осыған орай алты аймақ анықталды: төрт макронарық (Оңтүстік, Шығыс, Батыс және Солтүстік өңірлер) және екі облыс (Ақтөбе және Маңғыстау). Солтүстік Қазақстан облысы Солтүстік макроөңірге енді, онда сондай-ақ Қостанай, Ақмола, Қарағанды облыстары және Нұр-Сұлтан орналасқан. Қыркүйек айындағы сауда-саттық нәтижелері бойынша Солтүстік макроөңір үшін сұйытылған газдың барлық көлемі Қарағанды облысының кәсіпорнына берілді.

Олег Иванов атап өткендей, электрондық сауда-саттықты өткізу тәжірибесін қайта қарау қажет. Біріншіден, сауда-саттық «бірінші батырманы басу» қағидаты бойынша өтеді және өзге де бәсекелестік (аукциондық, тендерлік және т.б.) нысандарды қарастырмайды. Екінші мәселе - бес сауда сессиясы бойынша сауда қадамының жоғары құнына байланысты бір сауда кезеңі шеңберінде 46% және екі сауда кезеңі арасында 61% мөлшерінде баға өсетін болады.

Бұл мәселені «Атамекен» бақылауға алды, жақын уақытта KAZENERGY және уәкілетті мемлекеттік органдармен бірлесіп  мәселені егжей-тегжейлі талқылау үшін жұмыс тобы құрылады.

Естеріңізге сала кетейік, қыркүйек айында қазақстандық фермерлер астық кептіруде газ тапшылығына тап болды, олар астық кептіретін қондырғылардың жұмысына пайдаланылатын газ таба алмай әуре сарсаңға түсуде. Егін жинау жұмыстары жауын-шашын жағдайында жүргізілетінін ескерсек, алқаптардан жиналған ылғалды астық санаулы күндері «бүліне» бастауы мүмкін.