Ауыл шаруашылығы министрлігі мал экспортына квота бөледі

Ауыл шаруашылығы министрлігі «Қазақстан Республикасының аумағынан ауыл шаруашылығы малдарын әкетудің кейбір мәселелері туралы» бұйрық жобасын әзірледі. Аталған құжат «Ашық НҚА» порталында талқылау үшін жарияланды.

Бұйрық қабылданған жағдайда ҚР-да бұқалар мен қошқарларды шекарадан шығаруда  шектеулер (квоталар) енгізіледі.

Бұл квоталардың көлемі халық санына, тұтыну нормаларына, өндіріс балансына, қамтамасыз етілуіне және тапшылығына, қайта өңдеу кәсіпорындарының қажеттілігіне қарай әрбір өңір бойынша дайындалатын болады.

Квоталардың жылдық көлемі ҚР Стратегиялық жоспарлау және реформалар агенттігі Ұлттық статистика бюросының деректері негізінде есептеледі. Квоталардың жылдық көлемін алғаннан кейін уәкілетті орган оларды шешім қабылдау үшін Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның қарауына жібереді.

Квоталар көлемін бөлу үшін облыс, республикалық маңызы бар қалалар және астана әкімінің шешімімен жұмыс тобы құрылады, оның төрағасы әкімнің орынбасары болып табылады. Жұмыс тобының құрамына «Атамекен» өңірлік палатасының, қоғамдық бірлестіктердің өкілдері және ветеринария саласындағы функцияларды жүзеге асыратын жергілікті атқарушы органның құрылымдық бөлімшесінің мамандары кіреді.

Тақырыпқа байланысты оқу: Өзбекстан Қырғызстаннан мал сатып алатын болады

Квота алуға өтінімдерді қабылдау туралы хабарландырулар Қағидалар күшіне енген күннен бастап күнтізбелік 30 күн ішінде және кейіннен жыл сайын тиісті жылдың 1 ақпанына дейін жергілікті атқарушы органның ресми интернет-ресурсында орналастырылатын болады.

Естеріңізге сала кетейік, ағымдағы жылдың басында ІҚМ мен ІҚМ-нің аналық басын елден шығаруға тыйым салынған болатын. Шектеулерге Қазақстаннан Өзбекстанға тірі малды жаппай әкету себеп болды, соның салдарынан ішкі нарықта мал тапшылығы пайда болды. Бұқалар мен қошқарларды экспорттауды қайта бастау туралы шешім қабылдау кезінде квоталар енгізу жоспарланған, бірақ бұл шараны жүзеге асыру ұзаққа созылды. Shopan-atа қой өсірушілер ұлттық қауымдастығының төрағасы Алмасбек Садырбаев ұсақ қара малды тірідей экспорттауға толық тыйым салуды енгізуді ұсынды. Алайда Үкімет бұл ұсынысты қолдамады,ұсақ қара малды квоталау туралы шешім қабылдады.

Узнавайте первыми самые свежие новости агробизнеса Казахстана на нашей странице в Facebook, канале в Telegram, подписывайтесь на нас в Instagram или на нашу рассылку.